ابيات شعر عن رمضان .. فيها ضحك وفيها نصيحه ...
رمضان شهر الفضل والكرم والخيرات
شهر المأكولات والمشروبات والحلويات
وأهمها الشوربة والسمبوسك والكنافات
والله الله على السوبيا والبليلة واللقيمات
والتمييز والفول المبخّر وعليه جمرات
كل دا تاكله وتقول يالله كمان هات وهات
*****
شهر المقاضي والشنط والملبوسات
أسواق مليانة وعروض وتخفيضات
موسم مهرجانات وسحوبات وكوبونات
والتجار فرحانين .. وكيف ما يفرحوا
بعد ما نظّفوا المستودعات
*****
والشباب سهر للصبح ونهار في أحلى منامات
تسكّع في الشوارع ولعب وكورة ومباريات
والحريم شغالين ما بين خرجة ودخلة وزيارات
وخروج لتراويح ومن مسجد لمسجد في تنقّلات
تدّور أبو صوت حلو وبكاء ولا تدري عن الآيات
*****
أما الفضائيات وما أدراك ما الفضائيات
فوازير بالهبَل وبرامج ومسابقات
حفلات غنا ء وخيمات رقص وسهرات
وفيديو كليب وأفلام تعبانة ومسلسلات
ولا تناِقش في طاش ومقالب فنانين وفنانات
يضاربوك أهل الدشوش والقنوات والريموتات
ترى كل ما تقدم من أركان رمضان ومن الواجبات
كيف ما تبغى الناس تحب شهر مليان بالملذّات
*****
لا تصدقوني تراني متألم على ما ذكر من صفات
حزني عليك يا رمضان يا أبو الفتوح والغزوات
يا أبو الأجور والكرم والحسنات المضاعفات
فيك سطّر أسلافنا أروع وأشهر الملحمات
بجهاد مخلص ضد العدو والنفس والشهوات
تركوا فيك كل رغبة وهوى وشهوة وملذات
فهموا بسرعة أن الصوم ما هو ترك المباحات
بل أهم منها ترك العبث والحرام والمكروهات
ولا غيبة و نميمة و كذب أو نظر لمحرمات
ولا ضياع أوقات على فوازير وأفلام ومسابقات
ولا شيشة وبلوت وسمر على أرصفة وف ديوانيات
ولا سب وشتائم ونرفزة وسماع أغاني ومحرمات
ولا سفور نساء وبهرجة في المساجد وفي المحلات
*****
سلفنا الصالح لو شافوا مسلمين اليوم والمسلمات
كان اتندموا كثير وتحسّروا على ما كان زمان وفات
كيف يكون دا حال مسلمين ومؤمنين ومؤمنات
كيف يبغوا يكسبوا بحالهم دا أي أجور وحسنات
صيامهم ما حيكون إلا جوع وعطش وندامات
وصلاتهم وقيامهم جهد وتعب وبدون أي جزاءات
انتبهوا من لعبة إبليس يا مؤمنين ويا مؤمنات
أشغلكم بالتوافه والعبث وضيع عليكم الفائدات
*****
رمضان شهر الكرم والصدقة والجود والعطاءات
ف كل ليلة عتق من النار وفيه تفتح أبواب الجنات
وفيه ليلة خير من ألف شهر بما فيه من أيام وساعات
وينادي ربنّا كل يوم يوشك عبادي أن يصيروا للجنات
وفيه تصفّد الشياطين والمردة وفيه تضاعف الحسنات
وفيه أكلة سحور مبروكة وف تأخيرها كل البركات
وفيه فتح مكة و غزوة بدر وغيرها من الفتوحات
عمرته تعدل حجة مع النبيّ عليه افضل الصلوات
ورمضان جُنّة من النار وحصن مو زيّ أي حصونات
وفيه تستغفر الملائكة لكل الصائمين والصائمات
ودعاء الصائم عند فطره من الدعوات المستجابات
وجبريل يدعو على اللي أدركوه ولم يغفر لهم ما فات
للصائم فرحتان فرحة بفطره وفرحة بلقاء رب البريات
الريان باب مخصص للصائمين يدخلوا منه للجنات
*****
كل هذا الفضل اللّي ذُكر ولسّة بنفكر في ملذات
لا تحزن لا تيأس إحنا لسّه في بداية الأوقات
قدامنا فرصة للتوبة وبذل الجهد والتضحيات
عسى نحصّل ما نقدر من موسم الخير والجنات
*****
يالله شمّر يا مسلم واطرد عنّك الكسل والشهوات
ابدأ صفحة جديدة مع الله في موسم الخير والعطاءات
عساك تفلح وتُكتب آخر الشهر من الفائزين والفائزات
ومن اللّي يستلموا بيمينهم اثمن وأغلى الصحيفات
